وفاقی حکومت کی تاخیر سے بزنس کمیونٹی کی کوششیں رائیگاں جائیں گی، فراز الرحمٰن
وفاقی حکومت کی تاخیر سے بزنس کمیونٹی کی کوششیں رائیگاں جائیں گی، فراز الرحمٰن
کراچی : (رپورٹ:عاصم آرائیں جہلمی)
پاکستان بزنس گروپ (PBGO) کے بانی اور کورنگی ایسوسی ایشن آف ٹریڈ اینڈ انڈسٹری (کاٹی) کے سابق چیئرمین فراز الرحمٰن نے وفاقی حکومت کی جانب سے انڈیپنڈنٹ پاور پروڈیوسرز (IPPs) کے مسئلے کے حل میں تاخیر پر شدید تشویش کا اظہار کیا ہے۔ انہوں نے خبردار کیا کہ حکومتی سست روی بزنس کمیونٹی کی انتھک محنت کو ضائع کردے گی اور ملکی معیشت کو نقصان پہنچائے گی۔
پاکستان کی صنعت پہلے ہی بجلی کے مہنگے نرخوں کے بوجھ تلے دبی ہوئی ہے، جو 2024 میں 13.5 سینٹ فی کلو واٹ آور تک پہنچ چکے ہیں، جبکہ امریکہ اور بھارت میں یہ نرخ 6.3 سینٹ اور چین میں 7.7 سینٹ ہیں۔ یہ فرق پاکستانی برآمدات کی مسابقت کو کمزور کر رہا ہے اور سرمایہ کاری کے رجحان کو متاثر کر رہا ہے۔
فراز الرحمٰن نے کہا کہ بزنس کمیونٹی، خاص طور پر یونائیٹڈ بزنس گروپ (UBG) کے صدر ایس ایم تنویر، طویل عرصے سے صنعتوں کے لیے توانائی اصلاحات اور بجلی کے نرخوں میں کمی کا مطالبہ کر رہے ہیں۔ تاہم، اگر حکومت بروقت فیصلے نہ کر سکی تو یہ تمام کوششیں بے کار ہو جائیں گی، جس کے نتیجے میں کاروباری طبقے کو شدید نقصان اٹھانا پڑے گا۔
بین الاقوامی توانائی ایجنسی (IEA) کی تازہ ترین رپورٹ کے مطابق عالمی سطح پر بجلی کی طلب میں 2027 تک سالانہ تقریباً 4% اضافہ متوقع ہے، جبکہ چین اور بھارت میں یہ اضافہ 6-7% سالانہ ہوگا۔ چین میں بجلی کا توانائی کے کل استعمال میں حصہ 28%، امریکہ میں 22% اور یورپی یونین میں 21% تک پہنچ چکا ہے، جو دنیا بھر میں صنعتوں میں بڑھتی ہوئی برقی کاری کی عکاسی کرتا ہے۔ لیکن پاکستان مہنگے بجلی معاہدوں اور ناقص پالیسیوں کے باعث ترقی کی اس دوڑ میں پیچھے رہتا جا رہا ہے۔
فراز الرحمٰن نے وفاقی حکومت سے فوری اقدامات کرنے کا مطالبہ کرتے ہوئے کہا کہ IPPs معاہدوں پر نظرثانی، زائد صلاحیتی چارجز میں کمی، اور صنعتوں کے لیے سستی بجلی کی فراہمی ناگزیر ہو چکی ہے۔ انہوں نے خبردار کیا کہ اگر مزید تاخیر کی گئی تو اس کے نتائج خطرناک ہوں گے، جن میں صنعتی بندش، بے روزگاری میں اضافہ، اور معیشت کی مزید بدحالی شامل ہیں۔
#پاکستان_صنعت #توانائی_بحران #عالمی_معیشت #فراز_الرحمٰن #بزنس_کمیونٹی #ایس_ایم_تنویر
