
نیشنل کمیشن فار ہیومن ڈویلپمنٹ اور یونیورسٹی آف پشاور کے مابین مفاہمتی یادداشت ایم او یو پر دستخط
یہ معاہدہ تعلیم کی بہتری اور نوجوانوں کو سماجی خدمت میں شامل کرنے کا ایک اہم اقدام ہے۔ انور اقبال ڈائریکٹر آپریشنز
پشاور(نمائندہ قائم علی شاہ) گلوبل ٹائمز میڈیا یورپ کے مطابق نیشنل کمیشن فار ہیومن ڈویلپمنٹ (NCHD) اور یونیورسٹی آف پشاور کے درمیان تعلیم، صحت، اور سماجی مسائل پر آگاہی کے فروغ کے لیے ایک مفاہمتی یادداشت پر دستخط کیے گئے۔ اس معاہدے کا مقصد دونوں اداروں کے درمیان تعاون کو فروغ دینا ہے، جس میں سماجی مسائل پر طلبہ کی تربیت، اور Each One Teaches One پروگرام کا آغاز شامل ہے۔مفاہمتی یادداشت پر دستخط کی تقریب میں ڈائریکٹر آپریشنز NCHD، جناب انور اقبال نے NCHD کی نمائندگی کی، جبکہ ان کے ہمراہ ڈپٹی ڈائریکٹر سعید خان بھی موجود تھے۔ یونیورسٹی آف پشاور کی جانب سے وائس چانسلر پروفیسر ڈاکٹر قاضی نعیم, ڈاکٹر شکیل، ڈاکٹر بشرہ اور ڈاکٹر گوہر نے شرکت کی۔معاہدے کے تحت، NCHD طلبہ کو مختلف تربیتی پروگرامز کے ذریعے خواندگی کی تدریس اور سماجی مسائل پر کام کرنے کے لیے تیار کرے گا۔ کامیاب طلبہ کو سرٹیفکیٹس دیے جائیں گے۔تعلیم کے فروغ کے لیے Each One Teaches One مہم کا آغاز وزیر اعظم کی ہدایات کے تحت کیا جا رہا ہے، جس میں ہر طالبعلم کم از کم ایک ناخواندہ فرد کو تعلیم دینے کا پابند ہوگا۔این سی ایچ ڈی کے ڈائریکٹر آپریشنز، جناب انور اقبال نے کہا کہ یہ معاہدہ تعلیم کی بہتری اور نوجوانوں کو سماجی خدمت میں شامل کرنے کا ایک اہم قدم ہے۔انہوں نے یونیورسٹی آف پشاور کی قیادت کا شکریہ ادا کیا اور اس شراکت کو ملک میں ناخواندگی کے خاتمے کے لیے سنگ میل قرار دیا۔یونیورسٹی آف پشاور کے وائس چانسلر نے این سی ایچ ڈی کے تعاون کو سراہتے ہوئے کہا کہ یہ اقدام نوجوانوں کی تربیت اور سماجی خدمت کے فروغ کا ایک اہم ذریعہ ہے۔ ڈاکٹر شکیل نے اس شراکت داری کے عملی پہلوؤں پر روشنی ڈالی اور کہا کہ طلبہ کو خواندگی کی تدریس کے لیے مکمل تربیت اور رہنمائی فراہم کی جائے گی۔تقریب کے آخر میں دونوں اداروں کے سربراہان نے اس عزم کا اظہار کیا کہ تعلیم، صحت، اور سماجی مسائل پر مشترکہ کوششوں کے ذریعے معاشرتی ترقی کے عمل کو تیز کیا جائے گا۔