پاسپورٹ ہیڈ کوارٹرز میں جدید ٹیکنالوجی کے حامل نئے پرنٹرز پہنچا دیئے گئے، جرمنی سے درآمد کیے گئے ان پرنٹرز میں دو جدید ای پرنٹرز اور چھ ڈیسک ٹاپ پرنٹرز شامل ہیں۔
ڈائریکٹر جنرل پاسپورٹس مصطفیٰ جمال قاضی نے ای پرنٹرز سیکشن کا دورہ کیا اور پرنٹرز کی انسٹالیشن کے عمل پر بریفنگ لی، پرنٹرز کی تنصیب کے لیے ایک غیر ملکی تکنیکی ٹیم بھی پاکستان پہنچی ہے جو جلد انسٹالیشن کا عمل مکمل کرے گی۔
ڈی جی پاسپورٹس کے مطابق یہ جدید پرنٹرز ایک گھنٹے میں ایک ہزار پاسپورٹس پرنٹ کرنے کی صلاحیت رکھتے ہیں، جدید ٹیکنالوجی کی مدد سے پرنٹنگ کے معیار میں بھی بہتری آئے گی۔
مصطفیٰ جمال قاضی نے مزید بتایا کہ آئندہ ماہ مزید ای پرنٹرز بھی پاکستان لائے جائیں گے جس سے پاسپورٹ پرنٹنگ کا عمل مزید تیز ہو گا۔
