مودی نے پاکستانی قوم کو متحد کر دیا! انجینئر ندیم ممتاز قریشی

مودی نے پاکستانی قوم کو متحد کر دیا!
انجینئر ندیم ممتاز قریشی

مقبوضہ جموں و کشمیر میں دو قسم کی دہشت گردی ہے۔ ان میں سب سے بڑی اور خوفناک دہشت گردی وہ ہے جو بھارت کی قابض فوج کی جانب سے کشمیری عوام پر مسلط ہے۔ آٹھ ملین کشمیری عوام پر پانچ لاکھ بھارتی فوجی تعینات ہیں،یعنی ہر سولہ کشمیریوں پر ایک بھارتی سپاہی۔ یہ دنیا میں فوج کی سب سے زیادہ آبادی کے تناسب سے موجودگی ہو سکتی ہے۔

اس بڑی دہشت گردی کے مقابلے میں چھوٹی دہشت گردی کشمیری مزاحمتی نوجوانوں کی ہے۔ لیکن یہ مزاحمت اسی بڑی دہشت گردی کا ردعمل ہے۔ اگر بڑی دہشت گردی نہ ہوتی تو چھوٹی دہشت گردی کا کوئی وجود نہ ہوتا۔بھارت کی جانب سے کشمیری مزاحمت کو بیرونی سازش قرار دینا ایک گمراہ کن کوشش ہے۔اس کا مقصد دنیا کی توجہ اس ریاستی ظلم سے ہٹانا ہے جو کشمیریوں پر پچھلے تقریباً 79 برسوں سے جاری ہے۔یہ مزاحمت خالصتاً کشمیریوں کی اپنی ہے۔ بلاشبہ،ان کی ہر کارروائی قابلِ دفاع نہیں۔معصوم جانوں کا ضیاع قابلِ مذمت ہے،خواہ وہ بھارت کی قابض فوج کے ہاتھوں ہو یا مزاحمتی تحریک کے ذریعے۔لیکن اصل ذمہ دار بھارتی وزیراعظم نریندر مودی ہیں، جنہوں نے آئین میں ترمیم کر کے کشمیری عوام کے زخموں پر نمک چھڑکا اور مزاحمت کی آگ کو مزید بھڑکایا۔کشمیر میں ہر بے گناہ کی موت اور ہر دہشتگردی کا ذمہ دار وہی ہیں۔اب جب پاکستان کی کامیاب عسکری کارروائی ”آپریشن بنیان مرصوص“ نے مودی سرکار کو ہلا کر رکھ دیا ہے تو اسے چاہیے کہ اپنی فوج مقبوضہ کشمیر سے واپس بلائے اور کشمیریوں کو اقوامِ متحدہ کی 1949ء کی قرارداد کے مطابق اپنے مستقبل کا فیصلہ خود کرنے دے جس پر بھارت نے بھی دستخط کیے تھے۔پاکستان کے ہاتھوں عسکری سطح پر عبرتناک شکست کے بعد بھارت نے حسبِ روایت خفیہ سازشوں کا راستہ اپنایا ہے۔بھارتی میڈیا بلوچستان اور خیبر پختونخواء میں علیحدگی پسندی کی بے بنیاد باتوں سے پاکستان کو کمزور کرنے کی ناکام کوشش کر رہا ہے۔
لیکن نریندر مودی کو پہلے اپنے گھر کی فکر کرنی چاہیے۔ بھارت کی ناقابلِ تسخیر ہونے کی جو جھوٹی چمک تھی، وہ اب ماند پڑ چکی ہے۔ کشمیر، پنجاب، شمال مشرقی ریاستیں جیسے میزورم، ناگالینڈ، اور ریڈ کوریڈور کی ریاستیں جیسے چھتیس گڑھ اور تلنگانہ میں سرگرم علیحدگی پسند اب جان چکے ہیں کہ جسے وہ شیر سمجھتے تھے، وہ دراصل دانتوں سے خالی ایک بزدل شیر ہے۔حقیقت یہ ہے کہ مودی پاکستان سے زیادہ بھارت کے لیے خطرہ بن چکے ہیں۔ان کی انتہا پسند ہندوتوا سوچ نے بھارت کے آئینی سیکولرزم اور برابری کے اصولوں کو تار تار کر دیا ہے۔پاکستان کی جانب سے بھارتی شکست دونوں ملکوں کی سیاست پر اثر انداز ہوگی۔بھارت میں مودی کی شخصیت اور ساکھ کو شدید دھچکا لگا ہے۔انہوں نے بھارتی عوام کو ایک ایسی خفت کا سامنا کروایا ہے جو تاریخ میں پہلے کبھی کسی بھارتی رہنما نے نہیں کرائی۔ ان کا سیاسی سورج اب غروب ہونے کے قریب ہے۔دوسری جانب پاکستان میں فوجی ادارے کی ساکھ جو حالیہ برسوں میں کچھ حلقوں کی تنقید کا نشانہ بنی،اب عوام میں نئے جوش و جذبے کے ساتھ اجاگر ہوئی ہے۔ وہ حلقے جو ”امیرالمومنین“کے سحر میں گرفتار تھے، اب خاموش ہو چکے ہیں،اور قوم اپنے محافظوں پر فخر محسوس کر رہی ہے۔حیرت انگیز طور پر، مودی نے نادانستہ طور پر پاکستانی قوم کو متحد کر دیا ہے۔شاید وہ خود نہیں جانتے کہ وہ پاکستان کے سب سے بڑے خواب کو یعنی اتحاد، فخر اور خود اعتمادی کو حقیقت میں بدلنے کا ذریعہ بن چکے ہیں۔
٭٭٭