لاہور: بلاول بھٹو کے کاغذات نامزدگی پر اعتراضات دائر۔
بلاول بھٹو زرداری نے اپنے کاغذات نامزدگی میں پیپلز پارٹی- پارلیمینٹیرینز سے وابستگی ظاہر کی ہے۔درخواست گزار
لاہور(نمائندہ نادیہ تبسم)گلوبل ٹائمز میڈیا یورپ کے مطابق لاہور کے حلقہ این اے 127 میں پیپلز پارٹی کے چیئرمین بلاول بھٹو زرداری کے کاغذات نامزدگی پر ایک شہری نے اعتراض دائر کر دیا۔پیپلز پارٹی کے چیئرمین کی نامزدگی پر اعتراض کرتے ہوئے ریٹرننگ افسر کو درخواست دائر کر دی گئی۔درخواست کے مطابق، “انتخابی قانون کی خلاف ورزی کی گئی ہے کیونکہ قانون کے تحت کوئی شخص ایک سیاسی جماعت کا رکن ہوسکتا ہے۔درخواست گزار نے کہا کہ بلاول نے اپنے کاغذات نامزدگی میں پیپلز پارٹی-پارلیمینٹیرینز سے وابستگی ظاہر کی ہے۔جبکہ پاکستان پیپلز پارٹی اور پی پی پی-پارلیمینٹیرینز دو الگ الگ سیاسی جماعتیں ہیں۔درخواست کے مطابق بلاول بھٹو پیپلز پارٹی کے چیئرمین اور آصف علی زرداری پارلیمنٹیرینز کے صدر رہے ہیں۔پیپلز پارٹی کا انتخابی نشان تلوار ہے جب کہ ارکان پارلیمنٹ تیر کے نشان سے الیکشن لڑتے ہیں۔واضح رہے کہ لاہور کے حلقہ این اے 127 کے لیے بلاول بھٹو کے کاغذات نامزدگی کی جانچ پڑتال کل (جمعرات کو) ہوگی۔بلاول بھٹو زرداری نے این اے 194 لاڑکانہ اور این اے 196 شہداد کوٹ سے الیکشن لڑنے کے لیے کاغذات نامزدگی بھی جمع کرادیے۔
