پی ٹی آئی رہنما شاہد صدیق کے قتل کا ڈراپ سین ، بیٹا ہی قاتل نکلا
پی ٹی آئی رہنما اور نجی ہسپتال کے مالک ڈاکٹر شاہد صدیق کے قتل کا معمہ حل ہو گیا۔
ذرائع کے مطابق پولیس نے مقتول کے بیٹے قیوم شاہد کو گرفتار کر لیا، ملزم نے دوران تفتیش اپنے والد شاہد صدیق کو قتل کروانے کا اعتراف کر لیا۔
پولیس ذرائع کا کہنا ہے کہ قیوم شاہد نے اپنے والد شاہد صدیق کو خرچے کے لیے پیسے نہ دینے اور بے جا سختی کرنے پر قتل کروایا، 8 ماہ پہلے بھی چوہنگ کے علاقے میں بیٹے قیوم نے اپنے والد پر فائرنگ کی تھی۔
ایف آئی آر کے مطابق بیٹے نے شوٹرز کو پیسے دے کر والد کو قتل کروایا، شوٹرز کو کچھ رقم پہلے ادا کر دی گئی جبکہ باقی رقم قتل کے بعد دینی تھی، پولیس نے ملزم بیٹے قیوم صدیق کے سامنے تمام ثبوت رکھے تو ملزم نے اپنے جرم کا اعتراف کیا۔
ذرائع نے بتایا ہے کہ ڈاکٹر شاہد کے قتل کا مقدمہ ان کے دوسرے بیٹے تیمور کی مدعیت میں درج کیا گیا تھا، قتل کے وقت ڈاکٹر شاہد کے ساتھ بیٹا قیوم اور بھائی ساجد بھی ساتھ تھے۔
ڈاکٹر شاہد صدیق اپنی کار میں بیٹھنے لگے تو شوٹر نے آکر فائرنگ کردی جبکہ بیٹا قیوم سامنے اپنی کار کے پاس موجود تھا۔
