جہلم : ڈسٹرکٹ ہیڈکوارٹر ہسپتال جہلم کی تاریخ میں پہلی مرتبہ پتے کا بذریعہ لیپروسکوپی کامیاب آپریشن کیا گیا۔
سرجن ڈاکٹر احمد رضا نعمانی نے یہ آپریشن سرجری کی خاص تکنیک استعمال کرتے ہوئے کیا، جس میں مریض کو نہ تو طویل بے ہوشی دینا پڑتی ہے اور ناہی لمبا چوڑا کٹ لگانا پڑتا ہے بلکہ مریض کے پیٹ میں دو ،تین انتہائی چھوٹے کٹ لگا کر کیمرا اور دیگر مخصوص آلات کی مدد سے مریض کے پیٹ میں داخل کر کے آپریشن کیا جاتاہے، سرجن کیمرہ کی مدد سے اپنے کمپیوٹر کی سکرین پر دیکھتے ہوئے باہر سے ہی آپریشن کرتا ہے۔ اس قسم کے آپریشن اس سے قبل ملک کے بڑے شہروں میں ہو رہے تھے جبکہ اب ڈسٹرکٹ ہیڈ کوارٹر کی سطح پر جہلم میں بھی پہلی مرتبہ یہ آپریشن کامیابی سے مکمل ہوا۔ گزشتہ دنوں ڈپٹی کمشنر راؤ پرویز اختر کی کاوشوں سے فرحت کمال ضیاء کی جانب سے ڈسٹرکٹ ہیڈکوارٹر ہسپتال کے لئے لیپروسکوپی مشین کا عطیہ دیا گیا تھا، لیپروسکوپی ایک جدید سرجیکل مشین ہے جو آج سے پہلے کہیں ٹیچنگ ہستالوں میں موجود ہوتی تھی لیکن ڈپٹی کمشنر راؤ پرویز اختر کی کاوشوں سے اب یہ مشین ڈسٹرکٹ ہیڈکوارٹر ہسپتال میں بھی موجود ہے۔ لیپروسکوپی مشین ہرنیہ، اپینڈیکس اور ٹیومر وغیرہ کی سرجری میں استعمال کی جاتی ہے۔
رپورٹ:احمد رضا جہلم
