تقسیم نہیں، نظام کی درستگی پاکستان اور سندھ کو مضبوط بنائے گی

*کراچی کے معروف سینئر جرنلسٹ جاوید صدیقی کا بڑا دعویٰ*

*تقسیم نہیں، نظام کی درستگی پاکستان اور سندھ کو مضبوط بنائے گی*

کراچی کے معروف سینئر جرنلسٹ و کالمکار جاوید صدیقی نے کہا ہے کہ لکڑیوں کا گچھا الگ الگ لکڑیوں کے مقابلے میں زیادہ مضبوط، پائیدار اور طاقتور ہوتا ہے؛ اسی اصول کو ریاستی نظام پر بھی لاگو کیا جاسکتا ہے۔ پاکستان ہو یا سندھ، محض انتظامی یا سیاسی تقسیم کو تمام مسائل کا مستقل حل سمجھنا درست نہیں، اصل ضرورت نظام کی اصلاح اور حکمرانی کے معیار کو بہتر بنانا ہے۔انہوں نے کہا کہ معاشروں اور ریاستوں کی مضبوطی کا دارومدار سرحدوں یا تقسیم سے زیادہ قانون کی بالادستی، انصاف، میرٹ، شفافیت، مساوات اور مضبوط اداروں پر ہوتا ہے۔ اگر ایک ہی ریاست میں قانون طاقتور اور کمزور دونوں کے لیے یکساں ہو، انصاف آسان، فوری اور بلاامتیاز دستیاب ہو اور سرکاری عہدوں پر تقرریاں سفارش یا سیاسی وابستگی کے بجائے اہلیت و قابلیت کی بنیاد پر ہوں تو بہت سے بنیادی مسائل خود بخود کم ہوسکتے ہیں۔ جاوید صدیقی کے مطابق پاکستان بالخصوص سندھ کو درپیش مسائل میں سفارش، رشوت، اقرباپروری، اختیارات کا غلط استعمال، حق تلفی، میرٹ کی پامالی اور شفافیت کا فقدان بنیادی رکاوٹیں ہیں۔ ان برائیوں کے خاتمے کے بغیر نئی تقسیم، نئے انتظامی ڈھانچے یا نئی سرحدیں بھی عوام کو مطلوبہ انصاف، سہولت اور خوشحالی کی ضمانت نہیں دے سکتیں۔ انہوں نے کہا کہ ریاستی معاملات میں دیانت، امانت، جواب دہی اور عوامی خدمت کو بنیادی اصول بنانا ہوگا۔ ہر سرکاری ادارے، سیاسی عہدے دار اور بااختیار شخص کو اپنے فیصلوں، اخراجات، منصوبوں اور اختیارات کے استعمال کے حوالے سے قانون اور عوام کے سامنے جواب دہ ہونا چاہیے۔ ان کا کہنا تھا کہ سندھ کے شہری ہوں یا دیہی باشندے، سب ریاست کے برابر شہری ہیں۔ لسانی، علاقائی، شہری و دیہی یا کسی بھی دوسری بنیاد پر نفرت اور تفریق پیدا کرنے کے بجائے اہلیت، قابلیت، ذہانت، صلاحیت اور کردار کو ہر شعبے میں ترجیح دی جانی چاہیے۔ جاوید صدیقی نے زور دیا کہ پاکستان اور سندھ کو کمزور کرنے کا راستہ تقسیم، تعصب اور باہمی نفرت سے نہیں بلکہ اصلاح، اتحاد، انصاف، میرٹ اور قانون کی حکمرانی سے نکلتا ہے۔ اگر نظام درست کرلیا جائے، اداروں کو مضبوط اور غیر جانب دار بنایا جائے، قانون سب کے لیے برابر ہو اور عوام کو فوری انصاف و بنیادی سہولیات میسر ہوں تو یہی پاکستان اور یہی سندھ زیادہ مضبوط، مستحکم، پُرامن، خوشحال اور ترقی یافتہ بن سکتا ہے۔ انہوں نے کہا کہ اصل سوال یہ نہیں کہ ملک یا صوبہ کیسے تقسیم ہوگا؛ اصل سوال یہ ہے کہ موجودہ نظام کو عوام کے لیے منصفانہ، شفاف اور قابلِ اعتماد کیسے بنایا جائے۔