شدید بارش کے دوران عوام کی حفاظت اولین ترجیح ہے۔وزیراعلیٰ پنجاب
ریسکیو سروسز فوری حفاظتی اقدامات کریں اور نشیبی علاقوں سے لوگوں کو محفوظ مقامات پر بروقت نکالنے کو یقینی بنائیں۔مریم نواز شریف
لاہور(نمائندہ نادیہ تبسم)گلوبل ٹائمز میڈیا یورپ کے مطابق وزیراعلیٰ پنجاب مریم نواز شریف نے حکام کو ہدایت کی ہے کہ صوبے میں بارشوں کی پیش گوئی سے قبل عوام کے تحفظ کو یقینی بنانے کے لیے ضروری احتیاطی اور انتظامی اقدامات کریں۔وزیراعلیٰ نے کمشنرز، ڈپٹی کمشنرز اور ایم ڈی واسا کو چوکس رہنے اور نکاسی آب کو یقینی بنانے اور شہری سیلاب کو روکنے کے لیے تمام ضروری اقدامات کرنے کا حکم دیا ہے۔انہوں نے ریسکیو سروسز کو بھی ہدایت کی ہے کہ وہ فوری حفاظتی اقدامات کریں اور نشیبی علاقوں سے لوگوں کو محفوظ مقامات پر بروقت نکالنے کو یقینی بنائیں۔مریم نواز شریف نے حکام کو میڈیا، سوشل میڈیا اور موبائل الرٹ سروسز کے ذریعے نشیبی علاقوں میں لوگوں کو صورتحال سے آگاہ کرنے کی بھی ہدایت کی ہے۔وزیراعلیٰ نے متعلقہ افسران کو فیلڈ میں رہنے اور کسی بھی نقصان سے بچنے کے لیے تمام وسائل بروئے کار لانے کو یقینی بنانے کی ہدایت بھی کی ہے۔
لاہور سمیت دیگر شہروں میں ٹریفک کی روانی کو یقینی بنانے کے لیے مریم نواز شریف نے تمام ضروری اقدامات کرنے کا حکم دے دیا۔مزید برآں مریم نواز شریف نے دیہی علاقوں میں مویشیوں کے تحفظ کے لیے موثر اقدامات کرنے کا حکم دیا ہے۔
