جہلم سے راولپنڈی جی ٹی روڈ شدید ٹوٹ پھوٹ کا شکار، مسافروں کو شدید مشکلات کا سامنا
جہلم: جہلم سے راولپنڈی جانے والی اہم شاہراہ جی ٹی روڈ متعدد مقامات پر شدید ٹوٹ پھوٹ کا شکار ہو چکی ہے، جس کے باعث روزانہ سفر کرنے والے ہزاروں مسافروں، ٹرانسپورٹرز اور شہریوں کو شدید مشکلات کا سامنا ہے۔
سڑک پر جگہ جگہ بڑے گڑھے، ٹوٹی ہوئی سطح اور خراب حصوں کے باعث گاڑیوں کی رفتار انتہائی کم ہو گئی ہے، جبکہ موٹر سائیکل سواروں کے لیے صورتحال مزید خطرناک بن چکی ہے۔ بارش کے بعد گڑھوں میں پانی جمع ہونے سے سڑک کی خراب حالت مزید نمایاں ہو جاتی ہے اور ڈرائیوروں کو گڑھوں کا اندازہ نہ ہونے کے باعث حادثات کا خدشہ بھی بڑھ جاتا ہے۔
مسافروں کا کہنا ہے کہ جی ٹی روڈ جہلم، راولپنڈی اور دیگر علاقوں کے درمیان آمدورفت کا ایک اہم ذریعہ ہے، لیکن سڑک کی خستہ حالی کے باعث سفر نہ صرف دشوار بلکہ وقت طلب بھی ہو گیا ہے۔ خراب سڑکوں کی وجہ سے گاڑیوں کو بھی نقصان پہنچنے اور مرمت کے اخراجات میں اضافے کی شکایات سامنے آ رہی ہیں۔
شہریوں اور مسافروں نے متعلقہ حکام سے فوری نوٹس لینے، جی ٹی روڈ کے متاثرہ حصوں کی مرمت اور سڑک کی بحالی کا کام ہنگامی بنیادوں پر مکمل کرنے کا مطالبہ کیا ہے، تاکہ شہریوں کو محفوظ اور بہتر سفری سہولیات میسر آ سکیں
