ترکیہ میں تارکین وطن کی کشتی الٹ گئی، حادثے میں 14 افراد ہلاک ہوگئے۔
غیر ملکی میڈیا کے مطابق کشتی الٹنے کا افسوس ناک واقعہ ترکیے کے ساحلی شہر بودرم کے قریب بحیرہ ایجیئن میں پیش آیا، کشتی میں 18 افراد سوار تھے، حادثے میں کم از کم 14 تارکین وطن ہلاک ہوگئے جبکہ 2 افراد کو بچالیا گیا ہے۔
گورنر آفس نے بتایا کہ حادثے کی اطلاع ایک افغان شخص نے دی جو حادثے میں زندہ بچ کر تیر کر ساحل تک پہنچا، افغان شہری نے ایمرجنسی سروسز کو بتایا کہ 18 افراد کشتی پر سوار ہوئے تھے، لیکن کچھ ہی دیر بعد کشتی میں پانی بھر گیا اور وہ ڈوب گئی۔
گورنر کے دفتر کے مطابق ریسکیو ٹیموں نے ایک اور شخص کو بچالیا، جو قریبی جزیرے تک تیر کر پہنچنے میں کامیاب ہوا، کوسٹ گارڈ کی 4 کشتیاں، ایک ہیلی کاپٹر اور غوطہ خوروں کی خصوصی ٹیم لاپتہ افراد کی تلاش کے لیے آپریشن کر رہی ہے۔
رپورٹ کے مطابق یہ علاقہ تارکین وطن کے لیے ایک خطرناک مگر مختصر راستہ سمجھا جاتا ہے، جو ترکیے کے ساحل سے یونان کے قریبی جزائر تک جاتا ہے۔ یہ جزائر اکثر لوگوں کیلئے یورپی ممالک میں داخلے کا دروازہ بن جاتے ہیں۔
