جہلم میں بااثر افراد کی تجاوزات برقرار، سیوریج کا گندا پانی گلیوں میں، شہری پریشان

جہلم میں بااثر افراد کی تجاوزات برقرار، سیوریج کا گندا پانی گلیوں میں، شہری پریشان

جہلم: نواحی قصبہ ٹھوک وہاب دین، جہلم کینٹ ویسٹ کالونی اور کرسچن کالونی کے قریب مبینہ طور پر بااثر افراد نے بھینسوں کے بڑے بڑے واڑے قائم کر رکھے ہیں جبکہ سیوریج لائنوں اور سرکاری نالوں پر بھی ناجائز تجاوزات کر رکھی ہیں، جس کے باعث نکاسیٔ آب کا نظام بری طرح متاثر ہو چکا ہے اور سیوریج کا گندا پانی گلیوں اور سڑکوں میں جمع ہو رہا ہے۔
علاقہ مکینوں کے مطابق گندا پانی کھڑا رہنے سے شدید بدبو، مچھروں کی بہتات اور مختلف بیماریوں کے پھیلنے کا خطرہ بڑھ گیا ہے۔ شہریوں کا کہنا ہے کہ بچوں، خواتین اور بزرگوں کو روزانہ شدید مشکلات کا سامنا کرنا پڑ رہا ہے جبکہ آمدورفت بھی متاثر ہو رہی ہے۔
اہلِ علاقہ کا کہنا ہے کہ ڈپٹی کمشنر جہلم، پیرا فورس اور متعلقہ سرکاری اداروں کو متعدد بار تحریری اور زبانی شکایات کرنے کے باوجود آج تک یہ ناجائز تجاوزات برقرار ہیں اور کسی قسم کی مؤثر کارروائی نہیں کی گئی۔ شہریوں کے مطابق بااثر افراد کے خلاف کارروائی نہ ہونے سے عوام میں شدید تشویش پائی جاتی ہے۔
علاقہ مکینوں نے وزیراعلیٰ پنجاب، کمشنر راولپنڈی، ڈپٹی کمشنر جہلم، میونسپل کمیٹی اور دیگر متعلقہ اداروں سے مطالبہ کیا ہے کہ معاملے کا فوری نوٹس لیا جائے، سیوریج پر قائم ناجائز تجاوزات ختم کرائی جائیں، غیرقانونی بھینسوں کے واڑے ہٹائے جائیں اور ذمہ دار افراد کے خلاف قانون کے مطابق کارروائی کی جائے تاکہ شہریوں کو صاف ستھرا اور صحت مند ماحول میسر آ سکے۔
ہیڈ لائن:
"ڈپٹی کمشنر اور متعلقہ اداروں کو بارہا شکایات کے باوجود تجاوزات برقرار، ٹھوک وہاب دین اور جہلم کینٹ ویسٹ کالونی میں سیوریج کا گندا پانی گلیوں میں، شہری سراپا احتجاج”