پاکستان اور افغانستان کے درمیان ترجیحی تجارتی معاہدے پر دستخط ہوگئے۔
معاہدےکے تحت دونوں ممالک کی 4،4 برآمدی اشیاء پر ٹیکس میں نمایاں کمی کی گئی۔افغان سفارتخانے کا بیان
اسلام آباد(نمائندہ ذیشان نجم خان) گلوبل ٹائمز میڈیا یورپ کے مطابق پاکستان اور افغانستان کے درمیان ترجیحی تجارتی معاہدے پر باضابطہ طور پردستخط ہوگئے۔افغان سفارتخانے کے مطابق افغان نائب وزیر صنعت و تجارت ملا احمداللہ زاہد نے ترجیحی تجارتی معاہدے پر دستخط کیے اور پاکستان کی جانب سے سیکرٹری تجارت جواد پال نے معاہدے پر دستخط کیے۔افغان سفارتخانے نے بتایاکہ معاہدےکے تحت دونوں ممالک کی 4،4 برآمدی اشیاء پر ٹیکس میں نمایاں کمی کی گئی جس کے بعد انگور، انار، سیب اور ٹماٹرپرپاکستانی درآمدی ٹیرف 60 فیصد سے کم ہو کر27 فیصد ہوگیا جبکہ پاکستانی آم، کینو، کیلا اور آلو کی افغان درآمد پرٹیرف بھی27 فیصد تک محدود کیا گیا ہے۔افغان سفارتخانے کا کہنا ہے کہ یہ معاہدہ یکم اگست 2025 سے نافذ العمل ہوگا اور ایک سال کیلئے مؤثر ہو گا، معاہدہ قابل تجدید ہے اور مستقبل میں مزید اشیا شامل کرنے کی اجازت دیتا ہے۔