ٹرمپ کے اقدامات سے امریکا محفوظ ہوا نہ مضبوط’، کاملا ہیرس کی وینزویلا پر امریکی حملے کی مذمت۔
امریکی عوام جنگوں کے حق میں نہیں ہیں اور وہ مسلسل جھوٹ سن سن کر تنگ آ چکے ہیں۔سابق امریکی نائب صدر
واشنگٹن(نمائندہ فضل خان) گلوبل ٹائمز میڈیا یورپ کے مطابق امریکا کی سابق نائب صدر اور ڈیموکریٹ رہنما کاملا ہیرس نے وینزویلا پر کیے گئے امریکی حملے کی سخت مذمت کی ہے۔کاملا ہیرس کا کہنا ہے کہ صدر ٹرمپ کے اقدامات نے نہ امریکا کو محفوظ بنایا، نہ مضبوط کیا اور نہ ہی عوام کے لیے کوئی ریلیف فراہم کیا۔ اپنے بیان میں انہوں نے کہا کہ اگرچہ مادورو ایک غیر قانونی، ظالم اور آمر حکمران ہیں، تاہم اس سے یہ حقیقت تبدیل نہیں ہوتی کہ وینزویلا پر امریکی حملہ غیر قانونی اور غیر دانشمندانہ تھا۔انہوں نے مزید کہا کہ حکمرانوں کی تبدیلی یا تیل کے حصول کے لیے جنگوں کو امریکی طاقت کی علامت بنا کر پیش کیا جاتا ہے، مگر اس کی اصل قیمت امریکی عوام کو ادا کرنی پڑتی ہے۔ کاملا ہیرس کے مطابق امریکی عوام جنگوں کے حق میں نہیں ہیں اور وہ مسلسل جھوٹ سن سن کر تنگ آ چکے ہیں۔واضح رہے کہ امریکا نے ہفتے کے روز وینزویلا پر حملہ کیا تھا، جس کے دوران امریکی ڈیلٹا فورس نے وینزویلا کے صدر نکولس مادورو اور ان کی اہلیہ کو صدارتی محل سے حراست میں لے لیا۔