مستقبل پاکستان کے چیئرمین انجینیئر ندیم ممتاز قریشی نے دفتر خارجہ کی ترجمان محترمہ ممتاز زہرا بلوچ کے حالیہ بیان پر تبصرہ کرتے ہوئے کہا ہے
کہ پاکستان کا امریکا اور دیگر عالمی طاقتوں کے ساتھ تعلقات میں غیر جانبداری اور عدم مداخلت کی پالیسی برقرار رکھنا ہمارے قومی مفاد کے لیے ناگزیر ہے۔ تاہم، فلسطین اور کشمیر جیسے انسانی حقوق کے مسائل پر پاکستان کو اپنے موقف میں مضبوطی سے کھڑے رہنے کی ضرورت ہے۔
انجینیئر ندیم ممتاز قریشی نے زور دیا کہ فلسطین میں اسرائیلی جارحیت اور نسل کشی عالمی برادری کے ضمیر کو جھنجھوڑنے کے لیے کافی ہے۔ انہوں نے مطالبہ کیا کہ عالمی طاقتیں فلسطینیوں کے حقوق کی پامالی کو روکنے کے لیے فوری اور مؤثر اقدامات کریں۔ اس کے علاوہ، غزہ میں اسرائیلی حملوں کے نتیجے میں بےگناہ شہریوں اور زخمیوں کی فوری طبی امداد کی فراہمی کو یقینی بنانے کے لیے اقوام متحدہ کو فوری طور پر اپنا کردار ادا کرنا چاہیے۔
مقبوضہ کشمیر کے حوالے سے انجینیئر ندیم ممتاز قریشی نے کہا کہ حریت رہنما یاسین ملک کی بگڑتی ہوئی صحت اور ان پر لگائے گئے بےبنیاد مقدمات بھارت کے جابرانہ اقدامات کا ثبوت ہیں۔ انہوں نے بھارتی حکومت سے مطالبہ کیا کہ یاسین ملک کی فوری رہائی اور ان کو طبی سہولیات فراہم کی جائیں، تاکہ ان کی زندگی کو محفوظ بنایا جا سکے۔
چیئرمین مستقبل پاکستان نے مزید کہا کہ پاکستان اور امریکا کے دیرینہ تعلقات اہم ہیں، لیکن ان تعلقات کو برقرار رکھتے ہوئے ہمیں اپنی خودمختاری اور قومی سلامتی پر کوئی سمجھوتہ نہیں کرنا چاہیے۔