ڈسٹرکٹ گھوٹکی کے علاقے راونتی میں شہیدہونے والے آواز ٹی وی کے رپورٹرمحمد بچل گھنیوں
*ڈسٹرکٹ گھوٹکی کے علاقے راونتی میں شہیدہونے والے آواز ٹی وی کے رپورٹرمحمد بچل گھنیوں کے قتل کے خلاف کراچی پریس کلب کے باہر احتجاجی مظاہرہ*
*سندھ حکومت اور قانون نافذ کرنے والے ادارے صحافیوں کے قاتلوں کو گرفتار کرنے میں مکمل طور پرناکام ہو گئے ہیں، سیکرٹری کراچی پریس کلب*
*تمام تر یقین دہانیوں کے باوجود قاتل تو گرفتار نہیں ہوئے بلکہ مقتولین کی تعداد میں اضافہ ہورہا ہے جو قابل مذمت ہے، شعیب احمد خان*
کراچی (رپورٹ: جاوید صدیقی) آواز ٹی وی کے گھوٹکی روانتی میں شہید ہونے والے رپورٹر محمد بچل گھنیو کے قتل کے خلاف گزشتہ روز کراچی پریس کلب کے باہر احتجاجی مظاہرہ کیا گیا۔ مظاہرے میں کراچی پریس کلب کے سیکرٹری شعیب احمد خان، پی ایف یوجے کے رہنما خورشید عباسی، کراچی پریس کلب کے سابق گورننگ باڈی ممبر ذوالفقار راجپر سمیت صحافیوں کی ایک بڑی تعداد نے شرکت کی۔ اس موقع پر مظاہرین سے خطاب کرتے ہوئے سیکرٹری کراچی پریس کلب شعیب احمد خان نے محمد بچل گھنیو کے قتل کی شدید مذمت کرتے ہوئے مطالبہ کیا کہ محمد بچل گھنیوں اورجان محمد مہر سمیت قتل ہونے والے تمام صحافیوں کے قاتلوں کو فوری گرفتار کیا جائے۔ انہوں نے کہا کہ صحافی نصراللہ گڈانی کے بعد صحافی محمد بچل گھنیوں کو بھی شہید کردیاگیا، جس کی ہم پر زور مذمت کرتے ہیں۔ گھوٹکی صحافیوں کے لئے خطرناک ترین ڈسٹرکٹ بن گیا ہے۔ سندھ حکومت اور اس کے ماتحت قانون نافذ کرنے والے ادارے صحافیوں کے قاتلوں کو گرفتار کرنے میں مکمل طور پر ناکام ہوگئے ہیں۔ تمام تر یقین دہانیوں کے باوجود قاتل تو گرفتار نہیں ہوئے بلکہ مقتولین کی تعداد میں اضافہ ہورہا ہے جو قابل مذمت ہے۔ انہوں نے کہا کہ قاتل اتنے باثر اور طاقتور ہیں کہ وہ قانون نافذ کرنے والے اداروں کو خاطر میں نہیں لاتے۔ شعیب احمد خان نے کہا کہ وزیر اعلیٰ سندھ، وزیر داخلہ سندھ اور آئی جی سندھ نے کئی بار جان محمد مہر سمیت دیگر صحافیوں کے قاتلوں کی گرفتاری کیلئے تسلیاں دیں جو وقت گزرنے کیساتھ ساتھ بے معنی نظر آئیں۔ انہوں نے کہا کہ اگر جان مہر کے قاتلوں کو بروقت گرفتار کرلیا جاتا تو شر پسندوں اور دہشتگردوں کے حوصلے اتنے بلند نہ ہوتے کہ وہ دن دیہاڑے صحافیوں کو گولیوں کا نشانہ بنا رہے ہیں۔ انہوں نے مطالبہ کیا کہ محمد بچل گھنیو جان اور محمد مہر سمیت تمام صحافی شہدا کے قاتلوں کو فوری گرفتار کیا جائے، مظاہرے سے پی ایف یو جے کے رہنما خورشید عباسی سمیت متعدد صحافی رہنماؤں نے بھی خطاب کیا۔
