پیراپلیجک سنٹر پشاور کے زیر اہتمام کلب فٹ بچوں کے علاج پر کامیاب تربیتی ورکشاپ کا انعقاد

پیراپلیجک سنٹر پشاور کے زیر اہتمام کلب فٹ بچوں کے علاج پر کامیاب تربیتی ورکشاپ کا انعقاد۔

پیدائشی ٹیڑھے پاؤں والے بچوں کے مفت علاج کا دائرہ ہری پور تک وسیع کر دیا گیا۔

پشاور(نمائندہ خصوصی)گلوبل ٹائمز میڈیا یورپ کے مطابق پیراپلیجک سینٹر پشاور کے زیراہتمام دو روزہ اے سی ٹی بیسک کلب فٹ ٹریٹمنٹ پرووائیڈر ورکشاپ کا کامیاب انعقاد کیا گیا۔ مجموعی طور پر 8 طبی ماہرین کو جامع تربیت دی گئی، جن میں سے 5 نئے ڈاکٹروں اور فزیو تھرآپسٹس کا تعلق ڈی ایچ کیو ٹیچنگ ہسپتال ہری پور اور 3 کا پیر اپلیجک سینٹر پشاور سے تھا۔ اس تربیت کا مقصد طبی ماہرین کی مہارت اور علم میں اضافہ کرنا ہے تاکہ کلب فٹ عارضہ کے شکار بچوں کو بالکل مفت مگر اعلیٰ معیار علاج فراہم کیا جا سکے۔ پیر اپلیجک سینٹر پشاور کے چیف ایگزیکٹیو ڈاکٹر سید محمد الیاس نے سی پی ایم آر سیمینار ہال میں منعقدہ ایک سادہ مگر پروقار تقریب میں تربیتی کورس مکمل کرنے والے شرکاء کو اسناد سے نوازا۔ انہوں نے فارغ التحصیل ماہرین کے سیکھنے کی لگن کو سراہتے ہوئے اس امید کا اظہار کیا کہ وہ ہری پور میں نئے قائم کردہ کلب فٹ کلینک میں متاثرہ بچوں کا سو فیصد مفت اور مؤثر علاج یقینی بنائیں گے۔ ڈاکٹر الیاس سید کا کہنا تھا کہ حالیہ اقدام پیر اپلیجک سینٹر پشاور اور میریکل فیٹ کے وسیع تر ملک گیر مشترکہ تعاون کا حصہ ہے، جس کا مقصد ہری پور اور اس کے گرد و نواح میں کلب فٹ کلینک کے ذریعے مفت علاج کی سہولیات فراہم کرنا ہے۔ انہوں نے مزید کہا کہ اس پروگرام کو پہلے ہی خیبرپختونخوا کے بڑے شہروں بشمول پشاور، ایبٹ آباد، سوات، صوابی کے علاوہ اسلام آباد اور مظفرآباد (آزاد کشمیر) میں کامیابی سے متعارف کرایا جا چکا ہے۔ مستقبل میں اسے ڈیرہ اسماعیل خان، بنوں اور ضم شدہ اضلاع تک توسیع دینے کا منصوبہ ہے۔ڈاکٹر عامر زیب، صوبائی کوآرڈینیٹر کلب فٹ پروگرام اور پیر اپلیجک سینٹر پشاور کے نمائندہ نے تربیتی ورکشاپ کے دوران بتایا کہ ہم کلب فٹ کے شکار بچوں کے جامع علاج م کیلئے پرعزم ہیں اور یہ تربیت ہمارے اس مشن کا ایک اہم قدم ہے۔ ہم میریکل فیٹ کے تعاون کے شکر گزار ہیں اور اس شراکت کو جاری رکھتے ہوئے بچوں اور انکے اہل خاندان کی زندگی بہتر بنانے کیلئے کوشاں ہیں۔ انہوں نے کہا کہ پیراپلیجک سینٹر پشاور اور میراکل فیٹ کا مشترکہ وژن ہے کہ کلب فٹ کے شکار ہر بچے کا بروقت اور معیاری علاج یقینی بنایا جائے۔ حالیہ اقدام کے ذریعے اس مشترکہ مشن کا اہم سنگ میل عبور کیا گیا ہے۔ یہ بات قابل ذکر ہے کہ اے سی ٹی (افریقہ کلب فٹ ٹریننگ) پروگرام بنیادی سطح کا تربیتی پروگرام ہے، جو سب صحارا افریقہ میں کلب فٹ کے علاج کے نظام کو مضبوط بنانے میں کلیدی کردار ادا کر رہا ہے۔ 2015 سے 2017 کے دوران، اس پروگرام کے ذریعے 18 ممالک میں نئے قومی ٹرینرز کو تربیت دی گئی، جس سے شراکت داری کو فروغ دینے اور علاج کے نتائج کو بہتر بنانے میں مدد ملی۔ افریقہ کلب فٹ ٹریننگ پروگرام کو تین تدریجی مراحل میں ترتیب دیا گیا ہے، جن میں بیسک کلب فٹ ٹریٹمنٹ پرووائیڈر کورس، ایڈوانسڈ کلب فٹ ٹریٹمنٹ پرووائیڈر کورس اور ٹرین دی ٹرینر (TTT) پروگرام شامل ہیں۔ یہ تربیتی پروگرام طبی ماہرین کو پونسیٹی طریقہ کے مؤثر اطلاق کیلئے تیار کرتا ہے، تاکہ ہر بچے کو بروقت اور معیاری علاج فراہم کیا جا سکے۔