*وزیر بلدیات سندھ سعید غنی کا کراچی پریس کلب کے عہدیداران سے اجلاس*
کراچی (رپورٹ: جاوید صدیقی) وزیر بلدیات سندھ سعید غنی نے کہا ہیکہ پاکستان پیپلز پارٹی کی سندھ حکومت نے ہمیشہ صحافیوں کی فلاح و بہبود بالخصوص ان کی رہائش کیلئے پلاٹس کی فراہمی سمیت دیگر پر بھرپور توجہ دی ہے۔ ایل ڈی اے اور ایم ڈی اے کے صحافیوں کے پلاٹس پر اسی فیصد سندھ حکومت کی ادائیگی اور وہاں پر ترقیاتی کاموں کیلئے تمام اقدامات مکمل کرلئے ہیں۔ گذشتہ سال کی سالانہ ترقیاتی اسکیموں میں سندھ حکومت نے کوئی نئی ترقیاتی اسکیم شامل نہیں کی تھی البتہ اس سال ایل ڈی اے میں ہاکس بے پر ترقیاتی کاموں کی پی سی ون بنا لی گئی ہے، جو اس سال کے سالانہ ترقیاتی پروگرام میں شامل کی جائیگی۔ سات سو نئے ممبران کو پلاٹس کی فراہمی کیلئے بھی زمین مختص کرلی گئی ہے، کراچی پریس کلب کیجانب سے ان ممبران کی ویریفیکیشن کے بعد اسکی قرعہ اندازی جلد کردی جائیگی۔ ان خیالات کا اظہار انہوں نے گزشتہ روز کراچی پریس کلب کے صدر فاضل جمیلی کی قیادت میں آئے چار رکنی وفد کیساتھ اجلاس میں کیا۔ اجلاس میں سیکرٹری کے پی سی سہیل افضل خان، نائب صدر ارشاد کھوکھر اور خزانچی عمران ایوب شامل تھے جبکہ اجلاس میں اسپیشل سیکرٹری لوکل گورنمنٹ عائشہ حمید، ڈی جی ایل ڈی اے صفدر بگھیو، ڈی جی ایم ڈی اے سعید جمانی، پروجیکٹ ڈائریکٹر لئیق احمد و دیگر ایل ڈی اے اور ایم ڈی اے کے افسران موجود تھے۔ اجلاس میں ایم ڈی اے کی تیسر ٹاؤن میں صحافیوں کے پلاٹس میں سندھ حکومت کی جانب سے اسی فیصد ادائیگی، ہاکس بے میں ایل ڈی اے کی صحافیوں کے پلاٹس پر وہاں ترقیاتی کاموں، سات سو نئے کراچی پریس کلب کے ممبران کو پلاٹس کی فراہمی اور ڈپٹی کمشنر کیماڑی سے زمین کی منتقلی میں درپیش مسائل پر کراچی پریس کلب کے صدر فاضل جمیلی نے صوبائی وزیر کو آگاہ کیا۔ اس موقع پر ڈی جی ایل ڈی اے نے بتایا کہ گزشتہ مالی سال میں سندھ حکومت کی جانب سے اے ڈی پی میں کوئی نئی اسکیم نہیں رکھی گئی تھی، جسکی وجہ سے وہاں ترقیاتی کاموں کو سرانجام نہیں دیا جاسکا البتہ اسکی پی سی ون بنا کر منظور کروائی گئی ہے۔ صوبائی وزیر نے ہدایات دی کہ اس سال کے اے ڈی پی میں اس اسکیم کو لازمی شامل کیا جائے۔ سات سو نئے ممبران کو پلاٹس کی فراہمی پر ڈی جی ایل ڈی اے نے بتایا کہ اس سلسلے میں زمین کا انتظام کرلیا گیا ہے البتہ کراچی پریس کلب کی انتظامیہ کو ان سات سو ممبران کی ویریفیکیشن کیلئے بھیجا گیا ہے، وہاں سے فہرست ملتے ہی اسکی قرعہ اندازی کردی جائیگی۔ صوبائی وزیر نے صدر کراچی پریس کلب سے استدعا کی کہ اس فہرست کی فوری ویریفیکیشن کرکے اس بات کو بھی یقینی بنایا جائے کہ ماضی میں اگر کسی صحافی کو کسی اسکیم میں پلاٹ مل چکا ہو تو اسے دوبارہ نہ ملے بلکہ نئے ممبر کو یہ پلاٹس مل سکیں۔ ایم ڈی اے کے ڈی جی سعید جمانی نے اجلاس میں بتایا کہ اسی فیصد سندھ حکومت سے ادائیگی کی گورننگ باڈی سے منظوری کے بعد اسکی سمری فنانس ڈپارٹمنٹ کو ارسال کردی گئی ہے۔ صوبائی وزیر نے کراچی پریس کلب کے وفد کو یقین دہانی کروائی کہ وہ اس معاملہ کو ترجیح بنیادوں پر جلد از جلد حل کروائیں گے اور سندھ حکومت کے حصہ سے پیسہ ملتے ہی وہاں پر ترقیاتی کاموں کا بھی آغاز کردیا جائیگا۔ ڈی سی کیماڑی سے زمین کی میوٹشن پر صوبائی وزیر نے کہا کہ اس حوالے سے بھی وہ ریونیو منسٹر سے ملاقات کرکے اس معاملہ کو بھی جلد از جلد حل کروائیں گے۔ انہوں نے کہا کہ پاکستان پیپلز پارٹی اس ملک کی واحد سیاسی جماعت ہے جس نے آزادی صحافت اور صحافیوں کیلئے ہر وہ اقدامات کئے ہیں جو انکا حق ہے اور آئندہ بھی ہم اپنی صحافی برادری کیساتھ کھڑے ہیں۔ اس موقع پر صدر کراچی پریس کلب فاضل جمیلی و دیگر وفد کے ارکان نے صوبائی وزیر کی کاوشوں پر انکا شکریہ ادا کیا اور اس عزم کا اعادہ کیا کہ کراچی پریس کلب اور یہاں کے صحافیوں نے اس ملک میں جمہوریت کی بقا اور آمریت کے خاتمہ کیلئے ہمیشہ ہراول دستہ کا کردار ادا کیا ہے اور آئندہ بھی جمہوریت کے استحکام کیلئے وہ کسی قربانی سے دریغ نہیں کریں گے۔
