لاہور: انسداد دہشتگردی کی عدالت نے لاہور موٹروے زیادتی کیس کے مرکزی ملزم عابد ملہی کو 14 روزہ جوڈیشل ریمانڈ پر جیل بھجوا دیا گیا، جوڈیشل ریمانڈ کے دوران ملزم کی شناخت پریڈ کاعمل مکمل کیا جائے گا۔ دوسرا ملزم شفقت پہلے ہی جوڈیشل ریمانڈ پر جیل میں ہے۔
صدر مملکت عارف علوی نے ملزم کی گرفتاری کو باعث اطمینان قرار دیا۔ ان کا کہنا ہے کہ ملزم کو سخت ترین مثالی سزا ملنی چاہئے۔
وزیراعلیٰ پنجاب نے قانون نافذ کرنے والے اداروں کی کارکردگی کی تعریف کی۔ عثمان بزدار کی جانب سے سی آئی اے افسران کے لیے خصوصی انعام کا اعلان بھی کیا گیا۔ انہوں نے پولیس کی کارکردگی پر اطمینان کا اظہار کیا۔ وزیراعلیٰ کا کہنا ہے کہ مرکزی ملزم کی گرفتاری میں تاخیر ہوئی لیکن ایک لمحہ بھی ضائع نہیں کیا گیا، متاثرہ خاتون کو انصاف کی فراہمی کا وعدہ پورا کریں گے۔
موٹروے زیادتی کیس کا مرکزی ملزم عابد ملہی گرفتار
وفاقی وزیر اطلاعات شبلی فراز نے کہا کہ پنجاب پولیس نے پیشہ ورانہ مہارت دکھائی اور محنت کا ثبوت دیا۔ معاون خصوصی شہباز گل کا کہنا ہے کہ سفاک درندہ 33 روز بعد مانگا منڈی سے گرفتارہوا، قانون کے مطابق سزا دلوائیں گے۔ صوبائی وزیر اطلاعات فیاض الحسن چوہان کا کہنا ہے کہ حکمتِ عملی یہ تھی کہ ملزم ریلیکس محسوس کرے تاکہ اسے گرفتار کرنے میں آسانی ہو۔
یاد رہے ملزم کی گرفتاری کیلئے شیخوپورہ، قصور سمیت 70 سے زائد مقامات پر چھاپے مارے گئے مگر ہر بار ملزم عابد ملہی بھیس بدل کر اور چکمہ دے کر رفوچکر ہوتا رہا۔ پولیس نے تاندلیانوالہ میں ملزم عابد ملہی کی موجودگی پر چھاپہ مارا، ملزم پولیس کو چکمہ دے کر مانگا منڈی والد کے گھر پہنچا،جہاں پولیس نے دھرلیا۔
عابد ملہی پکڑا گیا یا خود گرفتاری دی ؟ موٹروے زیادتی کیس میں نیا موڑ سامنے آگیا
