عنوان: کال پر لبیک کہو

*ٹائٹل: بیدار ھونے تک*
*عنوان: کال پر لبیک کہو!!*
آج میں اپنےکالم میں عصر حاضر میں بڑھتی ہوئی سائنسی ترقی خاص طور سےموبائل کے دوران اپنی غفلت لاپروائی کی بناء پر ایمان کا زائل ہونا اور دین سے دوری کے اسباب و رموز کو آشکار کرنے کی کوشش کرونگا۔۔۔۔ معزز قارئین!! دنیا کے پہلے موبائل کا بنیادی کام صرف کال کروانا تھا اور موبائل کی اس پہلی نسل کو ون جی یعنی فرسٹ جنریشن کا نام دیا گیا اور اس موبائل میں کال کرنے اور سننے کے سوا کوئی دوسرا آ پشن نہیں ہوتا تھا پھر جب موبائلز میں ایس ایم ایس یعنی سینٹ میسج کا آپشن ایڈ ہوا تو اسے ٹو جی یعنی سیکنڈ جنریشن کا نام دیا گیا پھر جس دور میں موبائلز کے ذریعے تصاویر بھیجنے کی صلاحیت بھی حاصل کرلی گئی تو اس ایج کے موبائلز کو تھری جی یعنی تھرڈ جنریشن کا نام دیا گیا اور جب بذریعہ انٹرنیٹ متحرک فلمز اور مویز بھیجنے کی صلاحیت بھی حاصل کرلی گئی تو اس ایج کے موبائلز کو فور جی یعنی فورتھ جنریشن کا نام دیا گیا اور ابھی جب موبائلز کی دنیا فائیو جی کی طرف بڑھ رہی تو اس وقت تک دنیا کی ہر چیز کو موبائل میں شفٹ کر دیا گیا ہے۔ آج دنیا کا شائد ہی کوئی ایسا کام ہوگا جو موبائل سے نہ لیا جارہا ہو مگر حیرت ہے کہ اتنی ترقی کرنے اور نت نئے مراحل سے گزرنے کے باوجود یہ موبائل آج بھی اپنا بنیادی کام نہیں بھولا۔ آپ کوئی گیم کھیل رہے ہوں یا فلم دیکھ رہے ہوں، انٹرنیٹ سرچنگ کررہے ہوں یا وڈیو بنارہے ہوں الغرض موبائل پر ایک وقت میں مثلا دس کام بھی کر رہے ہوں لیکن جیسے ہی کوئی کال آئیگی موبائل فوراً سے پہلے سب کچھ چھوڑ کر آپ کو بتاتا ہے کہ کال آرہی ہے یہ سن لیں اور وہ اپنے اصل اور بنیادی کام کی خاطر باقی سارے کام ایک دم روک لیتا ہے اور ایک انسان جسے اللہ نے اپنی عبادت کیلئے پیدا فرمایا اور ساری کائنات کو اس کی خدمت کیلئے سجادیا وہ اللہ کی کال پر دن میں کتنی بار اپنے کام روک کر مسجد جاتا ہے؟؟؟؟ مسجد جانا تو درکنار اب اللہ کی کال یعنی اذان پر ہم اپنی گفتگو بھی روکنا مناسب نہیں سمجھتے۔عبادت ہر انسان اور نماز ہر مسلمان کی زندگی کا بنیادی جز ہے جس کی موت تک کسی صورت میں بھی معافی نہیں۔کاش ہم موبائل سے اتنا سا ہی سبق سیکھ لیں جسے ہم نے خود ایجاد کیا اور ایک لمحہ بھی خود سے جدا نہیں کرتے کہ دنیا کے سب ہی کام کرو مگراپنی پیدائش کا بنیادی مقصد اللہ کی عبادت کبھی نہ بھولو۔ *”اذان ہوتے ہی سب کچھ روک کر مسجد چلو اور اللہ کی کال پر لبیک کہو۔“*
*کالمکار: جاوید صدیقی*