*ٹائٹل: بیدار ہونے تک*
*عنوان: سندھ سمیت پورے ملک میں نئے صوبوں اور انتظامی یونٹس کا قیام ناگزیر ہوچکا ہے*
*تحریر: جاوید صدیقی*
معزز قارئین! پاکستان میں گزشتہ کئی ماہ سے ایک اہم قومی، سیاسی، آئینی اور انتظامی موضوع مسلسل زیرِ بحث ہے کہ کیا ملک میں مزید صوبے قائم کیے جانے چاہئیں؟ کیا موجودہ صوبائی ڈھانچہ بڑھتی ہوئی آبادی، انتظامی پیچیدگیوں، معاشی ناہمواریوں اور عوامی ضروریات کو پورا کرنے کی صلاحیت رکھتا ہے؟ کیا سندھ سمیت ملک کے دیگر صوبوں میں نئے صوبوں یا انتظامی یونٹس کا قیام وقت کی اہم ضرورت بن چکا ہے؟ یا پھر موجودہ نظام میں اصلاحات کرکے ہی عوام کو بہتر حکمرانی اور بنیادی سہولیات فراہم کی جاسکتی ہیں؟ یہ سوال اب محض اخبارات، ٹیلی ویژن، سوشل میڈیا، سیاسی جلسوں اور عوامی مباحثوں تک محدود نہیں رہا بلکہ پارلیمانی اور سیاسی حلقوں میں بھی اس پر گفتگو ہوتی دکھائی دے رہی ہے۔ مختلف سیاسی، مذہبی، سماجی، تجارتی اور کاروباری طبقات اپنے اپنے نقطۂ نظر کے ساتھ اس بحث میں شریک ہیں۔ بلاشبہ یہ ایک ایسا معاملہ ہے جس کا تعلق محض انتظامی نقشوں کی تبدیلی سے نہیں بلکہ پاکستان کے مستقبل، وفاقی وحدت، قومی یکجہتی، وسائل کی تقسیم، عوامی حقوق اور طرزِ حکمرانی سے بھی ہے۔ میری نظر میں اس بحث کو تین بنیادی نظریات میں تقسیم کیا جاسکتا ہے۔
*پہلا نظریہ: نئے صوبوں اور انتظامی یونٹس کے قیام کے حق میں*
اس طبقے کا مؤقف ہے کہ پاکستان کی آبادی میں مسلسل اضافہ، بڑے صوبوں کا وسیع رقبہ، انتظامی مشکلات، دور دراز علاقوں کی محرومیاں، وسائل کی غیر منصفانہ تقسیم، تعلیم و صحت کی ناکافی سہولیات اور حکومتی اداروں تک عام شہری کی محدود رسائی اس بات کا تقاضا کرتی ہے کہ نئے صوبے یا مؤثر انتظامی یونٹس قائم کیے جائیں۔ ان کے نزدیک جب ایک صوبائی دارالحکومت سے سینکڑوں میل دور آباد شہری کو اپنے بنیادی انتظامی، قانونی اور سرکاری مسائل کے حل کے لیے طویل سفر کرنا پڑے، جب ترقیاتی منصوبے چند بڑے شہروں تک محدود ہوجائیں، جب چھوٹے اضلاع اور دیہی علاقوں کو مسلسل نظرانداز کیا جائے تو پھر موجودہ انتظامی ڈھانچے پر نظرثانی ناگزیر ہوجاتی ہے۔ یہ مؤقف اپنی جگہ خاصا وزن رکھتا ہے۔ ریاست کا بنیادی مقصد عوام کو سہولت فراہم کرنا ہے، نہ کہ عوام کو ریاستی دفاتر کے چکر لگانے پر مجبور کرنا۔
*دوسرا نظریہ: نئے صوبوں کے قیام کی مخالفت*
اس طبقے کا خیال ہے کہ نئے صوبے بنانے سے انتظامی اخراجات میں غیر معمولی اضافہ ہوگا۔ نئے گورنر ہاؤسز، وزرائے اعلیٰ کے دفاتر، صوبائی اسمبلیاں، وزارتیں، سیکریٹریٹ، محکمے، سرکاری رہائش گاہیں، گاڑیاں، عملہ اور دیگر انتظامی ڈھانچے قائم کرنے کے لیے قومی خزانے پر اضافی بوجھ پڑے گا۔ ان کے مطابق اگر موجودہ ادارے ہی بدعنوانی، نااہلی، سیاسی مداخلت، اقربا پروری اور ناقص منصوبہ بندی کا شکار ہیں تو نئے صوبے بنانے سے بھی وہی خرابیاں نئے ناموں اور نئے دفاتر کے ساتھ سامنے آسکتی ہیں۔ مزید یہ کہ اگر اختیارات کی تقسیم واضح نہ ہو تو وفاق اور صوبوں کے درمیان تنازعات اور انتظامی پیچیدگیاں بھی پیدا ہوسکتی ہیں۔ اس طبقے کا یہ خدشہ بھی قابلِ غور ہے کہ محض سیاسی مفادات کے تحت نئے صوبے بنانے سے عوامی مسائل حل ہونے کے بجائے نئے انتظامی تنازعات جنم لے سکتے ہیں۔
*تیسرا نظریہ: اصل مسئلہ صوبوں کی تعداد نہیں، نظامِ حکمرانی ہے*
میرا نقطۂ نظر ان دونوں نظریات سے مختلف اور کسی حد تک ان دونوں کا احاطہ کرتا ہے۔ میں نئے صوبوں کے قیام کو اصولی طور پر غلط نہیں سمجھتا اور نہ ہی موجودہ صوبائی ڈھانچے کو ہر صورت برقرار رکھنے کا حامی ہوں۔ میرا سوال یہ ہے کہ کیا ہم نے کبھی سنجیدگی سے اپنے ریاستی اور حکومتی نظام کی بنیادی خامیوں کا جائزہ لیا ہے؟ کیا ہم نے کبھی یہ طے کیا ہے کہ ریاست کس کے لیے ہے؟ حکومت کا اصل مقصد کیا ہے؟ اقتدار کس کی امانت ہے؟ قومی وسائل پر کس کا حق ہے؟ حکمرانوں اور سرکاری عہدے داروں کی جواب دہی کس کے سامنے ہے؟ قانون کی بالادستی کا حقیقی معیار کیا ہے؟ اور سب سے بڑھ کر یہ کہ عام شہری کو عزت، تحفظ، روزگار، تعلیم، صحت، انصاف اور بنیادی انسانی حقوق کیوں میسر نہیں؟ میرا بنیادی مؤقف یہ ہے کہ پاکستان میں نئے صوبے بنیں یا نہ بنیں، نئے انتظامی یونٹس قائم ہوں یا موجودہ نظام برقرار رہے، جب تک ریاستی ڈھانچے میں عدل و انصاف، دیانت، امانت، شفافیت، قانون کی بالادستی، اختیارات کی منصفانہ تقسیم اور عوامی فلاح کو بنیادی حیثیت نہیں دی جاتی، تب تک مثبت اور پائیدار نتائج حاصل کرنا ممکن نہیں ہوگا۔
*سندھ اور نئے صوبوں کا معاملہ: انتظامی ضرورت یا سیاسی حساسیت؟*
سندھ پاکستان کی تاریخی، تہذیبی، ثقافتی، لسانی اور جغرافیائی شناخت کا ایک اہم ستون ہے۔ یہ سرزمین صوفیاء، اولیاء، دانش وروں، اہلِ علم، محنت کشوں، کسانوں اور مختلف قومیتوں سے تعلق رکھنے والے لوگوں کی مشترکہ تہذیب و تاریخ کی امین ہے۔سندھ کے حوالے سے نئے صوبوں کی بحث محض انتظامی معاملہ نہیں رہتی بلکہ اس کے ساتھ تاریخ، شناخت، زبان، ثقافت، وسائل، پانی، زمین اور سیاسی اعتماد جیسے حساس معاملات بھی جڑ جاتے ہیں۔ یہ حقیقت بھی نظرانداز نہیں کی جاسکتی کہ سندھ کے اندر کراچی جیسے بڑے تجارتی و صنعتی مرکز سے لے کر اندرونِ سندھ کے دور دراز دیہی علاقوں تک انتظامی ضروریات یکساں نہیں ہیں۔ کراچی کو شہری انفراسٹرکچر، ٹرانسپورٹ، پانی، نکاسیٔ آب، کچرے، تجاوزات، صحت، تعلیم اور شہری منصوبہ بندی کے سنگین مسائل درپیش ہیں، جبکہ اندرونِ سندھ کے متعدد علاقوں میں پینے کے صاف پانی، معیاری تعلیم، بنیادی صحت، زرعی سہولیات، روزگار، سڑکوں اور سرکاری خدمات کی فراہمی بنیادی چیلنجز ہیں۔ سوال یہ ہے کہ کیا ان مسائل کا حل صرف نئے صوبے بنانے میں پوشیدہ ہے؟ میری رائے میں ایسا نہیں۔ سندھ میں سب سے پہلے حقیقی بلدیاتی خودمختاری، ضلعی اختیارات، مالی وسائل کی منصفانہ تقسیم، شہری و دیہی ترقیاتی منصوبوں میں توازن اور مقامی نمائندوں کی مؤثر جواب دہی یقینی بنانا ہوگی۔ اگر کسی علاقے کے عوام انتظامی سہولت، بہتر حکمرانی اور اپنی مقامی ضروریات کے مطابق انتظامی ڈھانچے کا مطالبہ کرتے ہیں تو ان کی آواز کو تعصب یا مخالفت کی عینک سے دیکھنے کے بجائے سنجیدگی سے سنا جانا چاہیے۔ تاہم کسی بھی نئی صوبائی تقسیم کو زبردستی، سیاسی انتقام، لسانی بنیادوں یا کسی مخصوص طبقے کے مفادات کے تحت مسلط کرنا قومی یکجہتی کے لیے نقصان دہ ہوسکتا ہے۔ سندھ کی وحدت اور اس کے عوام کے آئینی و جمہوری حقوق دونوں کا تحفظ ضروری ہے۔ کسی ایک کو دوسرے کے مقابل کھڑا کرنا دانش مندی نہیں۔ میرا واضح مؤقف ہے کہ سندھ کے تمام شہریوں، دیہی آبادیوں، مختلف زبانیں بولنے والوں اور تمام طبقات کو اعتماد میں لے کر کوئی بھی فیصلہ کیا جانا چاہیے۔ نئے صوبوں کا معاملہ ہو یا انتظامی یونٹس کا، اس کا فیصلہ جذباتی نعروں کے بجائے عوامی مشاورت، آئینی تقاضوں، انتظامی ضرورت اور معاشی فزیبلٹی کی بنیاد پر ہونا چاہیے۔
*آئینِ پاکستان کیا کہتا ہے؟*
پاکستان کا آئین نئے صوبوں کے قیام اور انتظامی ڈھانچے میں تبدیلی کے لیے ایک باقاعدہ آئینی طریقۂ کار فراہم کرتا ہے۔ آئینِ پاکستان کے آرٹیکل 238 اور 239 کے تحت آئینی ترمیم کا طریقۂ کار موجود ہے۔ بالخصوص آرٹیکل 239 کی شق (4) کے مطابق اگر کسی آئینی ترمیم کے نتیجے میں کسی صوبے کی حدود تبدیل ہوتی ہیں تو اس ترمیمی بل کو صدرِ مملکت کی منظوری کے لیے اس وقت تک پیش نہیں کیا جاسکتا جب تک متعلقہ صوبائی اسمبلی اسے اپنے کل ارکان کی کم از کم دو تہائی اکثریت سے منظور نہ کرلے۔۔۔۔!!
