اسلام آباد: سینیٹ میں اپوزیشن لیڈر کے انتخاب کیلئے کوششیں تیز، دو آزاد ارکان ہدایت اللہ اور ہلال الرحمان نے یوسف رضا گیلانی کی تحریری حمایت کر دی۔
دوسری جانب پاکستان پیپلز پارٹی کے سینیٹر یوسف رضا گیلانی نے ایوان بالا میں قائد حزب اختلاف بننے کیلئے 30 سینیٹرز کے حمایتی دستخطوں کے ساتھ درخواست جمع کرا دی۔ یوسف رضا گیلانی نے درخواست چیئرمین سینیٹ صادق سنجرانی کے پاس جمع کروائی۔ شیری رحمان، روبینہ خالد و دیگر رہنما بھی ان کے ہمراہ تھے۔
یوسف رضا گیلانی کی ایوان بالا میں قائد حزب اختلاف بننے کے لئے درخواست پر 30 سینیٹرز نے تحریری حمایت کے لئے دستخط کیے ہیں۔
یاد رہے اسلام آباد ہائیکورٹ نے چیئرمین سینیٹ الیکشن سے متعلق سید یوسف رضا گیلانی کی درخواست ناقابل سماعت قرار دے کر خارج کر دی تھی۔ عدالت نے تحریری فیصلے میں کہا کہ توقع ہے منتخب نمائندے اور سیاسی قیادت عدالت کو ملوث کیے بغیر تنازعات حل کرنے کی کوشش کریں گے۔
