اسلام آباد: انتظار کی گھڑیاں ختم، کورونا ویکسین کی پہلی کھیپ ہفتے کو پاکستان پہنچے گی۔ پی آئی اے کا خصوصی طیارہ جمعہ کو بیجنگ روانہ ہوگا۔
کورونا ویکسین پاکستان لانے کے لئے انتظامات مکمل کرلئے گئے۔ وزارت خارجہ کے مطابق عالمی وباء سے بچاؤ کے لئے ویکسین کی پہلی کھیپ ہفتے کو پاکستان پہنچے گی۔
نیشنل ہیلتھ سروسز اور چینی سفارتخانے نے پی آئی اے کو گرین سگنل دے دیا۔ پاکستان انٹرنیشنل ایئر لائن کا خصوصی طیارہ جمعہ کو ویکسین لینے بیجنگ روانہ ہوگا۔ انسداد کورونا ویکسین لانے کیلئے پی آئی اے مفت خدمات فراہم کرے گی۔ قومی ایئر لائن کا خصوصی طیارہ چین سے انسداد کورونا ویکسین کی 5 لاکھ ڈوزز لائے گا۔ بیجنگ سے ویکسین خصوصی کنٹینر میں رکھ کر اسلام آباد لائی جائے گی۔
پاکستان میںاگلے ہفتےسےویکسینیشن شروع کرنیکا اعلان
دوسری جانب وفاقی وزیر برائے منصوبہ بندی اسد عمر نے اگلے ہفتے سے کورونا وائرس کی وبا کے سدباب کیلئے ویکسینیشن شروع کرنے کا اعلان کرتے ہوئے کہا کہ سب سے پہلے فرنٹ لائن ہیلتھ ورکرز کو حفاظتی ٹیکے لگائے جائیں گے۔
سماجی رابطوں کی ویب سائٹ ٹویٹر پر جاری اپنے بیان میں اسد عمر نے کہا کہ پاکستان میں 600 ویکسینیشن سینٹرز قائم کر دیئے گئے ہیں۔ ویکسینیشن کا نظام قائم کر دیا گیا ہے۔ ملک میں سیکڑوں ویکسینیشن مراکز کوویڈ ویکسین لگائیں گے۔
